Lagmannsretten tek stilling til ankar over avgjerder frå tingretten både i sivile saker og straffesaker. Medan tingrettar blir kalla domstolar i første instans, er lagmannsrettane altså domstolar i andre instans. Ved rettsleg overprøving av avgjerder frå Trygderetten er lagmannsretten første instans. Lagmannsretten handsamar også overskjønn og er i nokre tilfeller  ankeinstans for avgjerder frå jordskifterettane.

Kvar lagmannsrett har sitt eige område som blir kalla lagdømme. Lagmannsretten i kvart lagdømme skal behandle ankesaker frå førsteinstansdomstolane i dette lagdømmet. Landet er delt inn i seks lagdømme:

• Borgarting, med sete i Oslo, dekkjer fylka Oslo, Buskerud, Østfold og sørlege delar av Akershus.
• Eidsivating, med sete på Hamar, dekkjer fylka Hedmark, Oppland og nordlege delar av Akershus.
• Agder, med sete i Skien, dekkjer fylka Vestfold, Telemark, Aust-Agder og Vest-Agder.
• Gulating, med sete i Bergen, dekkjer fylka Hordaland, Sogn og Fjordane og Rogaland.
• Frostating, med sete i Trondheim, dekkjer fylka Møre og Romsdal, Sør-Trøndelag og Nord-Trøndelag.
• Hålogaland, med sete i Tromsø, dekkjer fylka Nordland, Troms og Finnmark.