Gyldigheita av vedtak om tilleggsskatt
Høgsteretts dom 10. desember 2018, HR-2018-2338-A, (sak nr. 18-102326SIV-HRET), sivil sak, anke over dom, Bravo Capital AS (advokat Egil Stefan Eilertsen) mot Staten v/Skatt øst (Regjeringsadvokaten v/advokat Ole Kristian Rigland)
Dommarar: Øie, Indreberg, Normann, Bergsjø, Falch
Skatteklagenemnda hadde fastsett tilleggsskatt etter at bruken av framførbart underskot blei avskoren på grunn av eigarskifte, jf. skattelova § 14-90. Høgsterett kom til at vedtaket var gyldig.
Bravo Capital AS hadde ved årsskiftet 2010/2011 eit framførbart underskot på rundt 13,7 millionar kroner. I 2011 skjedde det eit eigarskifte i selskapet som det ikkje blei opplyst om i sjølvmeldinga. Det framførbare underskotet blei brukt i 2012, 2013 og 2014. Skattekontoret blei i 2013 merksam på eigarskiftet og bestemte på bakgrunn av det å avskjere det framførbare underskotet i medhald av skattelova § 14-90 om bortfall av generelle skatteposisjonar ved skattemotiverte transaksjonar. Bravo Capital AS blei gitt tilleggsskatt for 2011 med 30 prosent av den skatten som ville blitt spart dersom underskotet hadde blitt brukt fullt ut i 2011, jf. likningslova 1980 § 10-4 nr. 3.
Høgsterett kom til at det er korrekt å bruke likningslova § 10-4 nr. 3 ved berekning av tilleggsskatt også når opplysningssvikten knyter seg til framførbart underskot. Anken frå Bravo Capital AS blei forkasta.
Dommen gir rettleiing om korleis ein skal forstå likningslova 1980 § 10-4 nr. 3, som er vidareført utan materielle endringar i skatteforvaltningslova § 14-5 nr. 3.