Straffutmåling ved gjentatt grov valdsutøving
Høgsteretts dom 13. mars 2018, HR-2018-491-A, (sak nr. 2017/2114), straffesak, anke over dom,
A (advokat John Christian Elden) mot Den offentlege påtalemakta (statsadvokat Alf Marttin Evensen)
Dommarar: Bergh, Arntzen, Matheson, Bull, Indreberg
Ein 35 år gammal mann blei dømd til fengsel i to år og tre månader for grov kroppsskade. Seks månader av straffa blei gjorde til vilkårsstraff. Straffa var ei fellesstraff med vilkårsdelen av to tidlegare dommar. Betydninga av dei tidlegare dommane stod sentralt i saka.
Høgsterett skjerpa straffa med omkring fire månader som følge av at den domfelte tidlegare var dømd for vald.
I ein av dei tidlegare dommane var ein vesentleg del av straffa gjord til vilkårsstraff som følge av lang saksbehandlingstid. Dei nye handlingane var gjorde i prøvetida for denne dommen.
Ved ein storkammerdom i Høgsterett frå 2016 (HR-2016-225-S) er det klarlagt at ein normalt skal gi kompensasjon for lang saksbehandlingstid i form av frådrag i totalstraffa og ikkje ved at ein del av straffa blir gjord til vilkårsstraff.
Høgsterett kom likevel til at det var grunnlag for å dømme til fellesstraff med vilkårsdelen av den tidlegare dommen. Ved fastsettinga av straffelengda blei det tatt omsyn til at den tidlegare vilkårsstraffa var gitt som følge av lang saksbehandlingstid.