Passiv medvirkning til barnemishandling
Høgsteretts dom 26. juni 2020, HR-2020-1343-A, (sak nr. 20-026386STR-HRET), straffesak, anke over dom.
A (advokat Øystein Ola Storrvik) mot Påtalemakta (statsadvokat Andreas Schei)
Dommarar: Matningsdal, Matheson, Bergsjø, Falch, Steinsvik
Høgsterett forkasta anken over domfellinga i lagmannsretten der ein far var dømd for passiv medverknad til grov mishandling av to spedbarn, utført av barnemora, jf. straffelova § 283, jf. § 282.
Saka reiste særleg spørsmål om kva som krevst for domfelling når faren er fråverande medan mora mishandlar barna.
Høgsterett kom til at det er eit vilkår for domfelling at omsorgspersonen kjenner til at mishandling skjer. Først da oppstår den straffsanksjonerte handleplikta. Tilsvarande krev domfelling for medverknad til grov mishandling at personen kjenner til omstende som gjer mishandlinga grov.
Høgsterett fann på dette grunnlaget at lovbruken i lagmannsretten var riktig, og at domsgrunnane var tilstrekkelege.
Dommen gir nærmare rettleiing om kva som skal til for å bli dømd for passiv medverknad til grov mishandling av barn utført av andre.