Straff for produksjon og oppbevaring av cannabis – samfunnsstraff
Høgsteretts dom 26. juni 2020, HR-2020-1349-A, (sak nr. 20-053734STR-HRET), straffesak, anke over dom.
A (advokat Halvard Helle) mot Påtalemakta (statsadvokat Per Eirik Vigmostad-Olsen)
Dommarar: Matningsdal, Noer, Bergsjø, Arntzen, Thyness
Ein 28 år gammal mann blei dømd til samfunnsstraff i 329 timar med subsidiær fengselsstraff på elleve månader.
Mannen var dømd for å ha dyrka cannabisplanter som potensielt kunne gi 1,5 kilo røykbart materiale, og for å ha oppbevart om lag 1,9 kilo tørka plantemateriale. Høgsterett uttalte at straffa for dette i utgangspunktet ville vore fengsel i elleve månader, etter at det mellom anna var tatt omsyn til tilståing og liggetid.
På grunn av at den domfelte hadde gjort store endringar i livet sitt etter at forholdet blei avdekt, blei han dømd til samfunnsstraff. Han hadde ikkje misbrukt stoff på eitt år, han hadde skaffa seg ny jobb og ein ny stad å bu, og han hadde brote med sin tidlegare omgangskrets. Han hadde eit langvarig misbruk av ulike typar stoff bak seg og var sårbar for tilbakefall ved soning.
Dommen gir retningslinjer for vilkåra for samfunnsstraff ved narkotikalovbrot.