Eigedomsmeklaren må betale erstatning etter feil ved bodrunden

I samband med salet av ei leilegheit i Oslo gav kjøparen eit bod som blei akseptert av seljaren innan akseptfristen. Men eigedomsmeklaren formidla ikkje vidare til bodgivaren at seljaren hadde akseptert bodet, og ein bindande avtale kom derfor ikkje i stand. Etter at akseptfristen var utløpt, kom det inn eit høgare bod på leilegheita, og bodrunden heldt fram. Leilegheita blei til slutt seld til kjøparen for 150 000 kroner meir enn det opphavlege bodet han hadde gitt, og som seljaren hadde akseptert.

I motsetning til lagmannsretten har Høgsterett komme til at eigedomsmeklaren handla aktlaust og på ein måte som innebar vilkår om erstatning overfor bodgivaren fordi han ikkje formidla vidare den første aksepten frå seljaren. Bodgivaren blir tilkjend erstatning frå eigedomsmeklingsføretaket og forsikringsselskapet deira tilsvarande differansen mellom det opphavlege bodet og den endelege kjøpesummen.

Dommen avklarer erstatningsansvaret for eigedomsmeklarar for feil som er gjorde under bodrunden.

Les heile avgjerda

Rettsområde: Erstatningsrett. Profesjonsansvar.

Nøkkelavsnitt: 35, 36, 46

Dommarar: Indreberg, Normann, Bergsjø, Steinsvik, Sæther