Nordreisa kommune kan saksøkast i tvist om allemannsretten

To personar som hadde beiterett for sau i eit utmarksområde, gjekk til søksmål mot Nordreisa kommune for å få dom for at det ikkje var tillate med hundekøyring i området. Hundekøyringa skjedde i medhald av allemannsretten, men saksøkarane meinte at køyringa mellom anna slit på terrenget og skremmer vekk sauene. Ifølge saksøkarane går hundekøyringa dermed utover dei grensene friluftslova set for utøving av allemannsretten. Søksmålet blei avvist av tingretten og lagmannsretten.

Høgsterett kom til at kommunen kan saksøkast i ei sak som gjeld den nærmare avklaringa av ferdselsretten for allmenta. Høvet til å få rettsavklaring i ein konflikt mellom grunneigarar eller bruksrettsinnehavarar og allmenta er avhengig av at dei førstnemnde har ein representant å forhalde seg til. Kommunen framstår som ein naturleg representant for allmenta i slike saker.

Avgjerda avklarer at ein kommune kan saksøkast i ein tvist som gjeld ferdselsrett for allmenta etter friluftslova.

Les heile avgjerda

Rettsområde: Sivilprosess. Allemannsretten. Tvistelova § 1-3, Friluftslova § 22

Nøkkelavsnitt: 42–43, 49, 51–53

Dommarar: Skoghøy, Normann, Ringnes, Falch, Sæther