Asylsaka til iransk konvertitt må behandlast på nytt i lagmannsretten
Høgsteretts dom 5. mai 2022, HR-2022-925-A, (sak nr. 21-149678SIV-HRET), sivil sak, anke over dom.
Staten v/Utlendingsnemnda (Regjeringsadvokaten v/advokat Henrik Vaaler) mot A (advokat John Christian Elden), Norsk organisasjon for asylsøkere (NOAS) (advokat Bettina Banoun)
Ein iransk asylsøkar som kom til Noreg i 2009, blei døypt i den lokale kyrkjelyden der han hadde busett seg. Han søkte ei rekke gonger om asyl fordi han meinte at han som kristen konvertitt hadde god grunn til å frykte at han kunne bli forfølgd i heimlandet. Utlendingsnemnda (UNE) avslo fleire søknader om asyl frå han.
Lagmannsretten meinte – i motsetning til UNE – at asylsøkaren ville utøve religionen sin på ein slik måte at han ville bli forfølgd om han returnerte til heimlandet.
Høgsterett viser til at lagmannsretten ikkje hadde vurdert kva det hadde å seie at forklaringa til asylsøkaren var tilpassa undervegs, og kom til at den konkrete rettsbruken til lagmannsretten bygde på eit uriktig beviskrav. Lagmannsrettsdommen blir derfor oppheva, og saka må behandlast på nytt.
Avgjerda slår fast at domstolane fullt ut kan prøve om UNEs vedtak er gyldige, inkludert den framtidsretta risikovurderinga om forfølging på grunn av religion. Avgjerda gir også rettleiing for kva beviskrav som skal leggast til grunn ved vurderinga.
Rettsområde: Utlendingsrett. Asyl. Utlendingslova § 28 første ledd bokstav a
Nøkkelavsnitt: 63–66, 71–72 og 90.
Dommarar: Matheson, Normann, Noer, Steinsvik, Sæther