26-åring blir dømd for forsøk på medverknad til terrorhandling
Høgsteretts dom 28. juni 2022, HR-2022-1299-A, (sak nr. 22-004630STR-HRET), straffesak, anke over dom.
Ein mann frå Skien var blitt domfelt i lagmannsretten for oppfordring til terrorhandling i Danmark, deltaking i terrororganisasjonen IS og forsøk på medverknad til ei terrorhandling i England. Deltakinga i IS bestod i å fremme bodskapen til organisasjonen, mellom anna ved å oppfordre til terrorhandlingar på sosiale medium.
Spørsmålet for Høgsterett var om det lagmannsretten hadde bedømt som oppfordring til terrorhandling, i staden utgjorde forsøk på psykisk medverknad til terrorhandling. Det følger av straffelova at forsøk på medverknad til terrorhandling blir straffa strengare enn oppfordring til terrorhandling.
Det avgjerande var om forsettet hans om at terrorhandlingane han oppfordra til, ville bli fullbyrda, var konkretisert nok mellom anna når det gjaldt tid og stad, til at han kunne dømmast for forsøk på medverknad til terrorhandlingane. Høgsterett kom, i motsetning til lagmannsretten, til at forsettet var tilstrekkeleg konkretisert.
Høgsterett skjerpa den samla straffa frå fengsel i 12 år til fengsel i 13 år og 10 månader.
Dommen gir rettleiing om kva krav som blir stilte til konkretisering av fullbyrdingsforsettet for at ei oppfordring til straffbar handling utgjer forsøk på medverknad til handlinga.
Rettsområde: Strafferett
Nøkkelavsnitt: 20, 22‒23, 31‒32 og 54‒56
Partar og prosessfullmektigar: Påtalemakta (statsadvokat Geir Evanger) mot A (advokat Nils Christian Nordhus)
Dommarar: Indreberg, Bull, Bergsjø, Ringnes, Steinsvik