Datamateriale innhenta av franske styresmakter kan brukast som bevis i norsk straffesak

Gjennom å installere programvare på ein dataserver i Frankrike hadde fransk politi klart å avlese dekryptert materiale frå brukarane av tenesta EncroChat i Noreg. Spørsmålet i saka var om materialet kunne brukast som bevis i ei norsk straffesak.

Høgsterett tok ikkje stilling til om datamaterialet kunne ha vore innhenta på tilsvarande måte etter norsk rett, men uttaler at dersom innhentinga av materialet ikkje kunne ha vore gjord lovleg i Noreg, må tre vilkår vere oppfylte for å bruke materialet som bevis i ei norsk straffesak:

- Bevisa må vera innhenta etter reglane som gjeld i det aktuelle landet.
- Den tiltalte må ha rett til innsyn i alle opplysningane som er innhenta.
- Innhentinga må ikkje vere gjennomført på ein måte som gjer at bruken som bevis vil vere i strid med grunnleggande norske verdiar.

Høgsterett fann at alle vilkåra var oppfylte. Det blei lagt avgjerande vekt på at det ikkje var tale om masseovervaking, og at Stortinget gjennom straffeprosesslova § 216 o har opna for datainnhenting i situasjonar som i alle fall etter ordlyden ligg nær opp til den aktuelle situasjonen. Det vil ikkje vere i strid med norske verdiar å bruke materialet som bevis.

Les heile avgjerda

Rettsområde: Straffeprosess. Straffeprosesslova § 216 o

Nøkkelavsnitt: 25–30, 35, 37, 42, 44

Partar og prosessfullmektigar: I. A (advokat Marius Oscar Dietrichson)
mot Påtalemakta (statsadvokat Andreas Magne Alfoni Strand)
II. B (advokat Berit Reiss-Andersen) mot Påtalemakta (statsadvokat Andreas Magne Alfoni Strand)
III. C (advokat Øystein Ola Storrvik) mot Påtalemakta (statsadvokat Andreas Magne Alfoni Strand)

Dommarar: Falkanger, Kallerud, Ringnes, Høgetveit Berg, Thyness