Vitne utan forklaringsplikt skulle møtt i retten

Nord-Troms og Senja tingrett hadde i ei straffesak om mishandling i nære relasjonar fritatt tre vitne frå å møte til hovudforhandlinga. Grunnen var at dei på førehand hadde opplyst om at dei ville bruke retten til å nekte å forklare seg. Vitna – kona til den tiltalte og to vaksne barn – var fornærma i straffesaka og hadde tidlegare gitt forklaring til politiet.

Hålogaland lagmannsrett meinte at det var ein saksbehandlingsfeil å frita vitna frå møteplikta, og oppheva den frifinnande tingrettsdommen.

Den tiltalte anka til Høgsterett, som no har forkasta anken.

Vitne utan forklaringsplikt skal ikkje automatisk bli fritatt frå å møte i retten når dei opplyser om at dei ikkje vil forklare seg. Fritak kan likevel innvilgast etter ei vurdering. I dette tilfellet tilsa omsynet til opplysinga av saka at vitna møtte.

Dommen avklarer når vitne kan få fritak for møteplikta.

Les heile avgjerda

Rettsområde: Straffeprosess. Straffeprosesslova §§ 108, 109, 113, 126

Nøkkelavsnitt: Avsnitt 29–32

Dommarar: Webster, Normann, Falch, Berglund, Thyness