Varemerkerett
Høgsteretts dom 14. desember 2021, HR-2021-2480-A, (sak nr. 21-065762SIV-HRET), sivil sak, anke over dom.
Olav Thon (advokat John Christian Elden) mot B, Madriku AS (advokat Vebjørn Krag Iversen)
Dommarar: Falkanger, Bergsjø, Arntzen, Høgetveit Berg, Steinsvik
I desember 2015 opna selskapet Madriku AS restauranten «Stortorvet Gjestgiveri» like ved Stortorget i Hamar sentrum. Olav Thon gjekk, som eigar av «Stortorvets Gjæstgiveri» i Oslo, til søksmål mot selskapet og styreleiaren med krav om at all bruk av namnet «Stortorvet Gjestgiveri» og den tilhøyrande logoen skulle opphøyre. Han gjorde gjeldande at bruken krenkte eineretten hans etter varemerkelova, og at bruken dessutan var i strid med marknadsføringslova. Han kravde også økonomisk kompensasjon for den urettmessige bruken.
Høgsterett kom til at kjenneteiknet «Stortorvets Gjæstgiveri» ikkje kunne vore registrert særskilt fordi det er beskrivande og utan særpreg. Ved denne vurderinga blei det lagt vekt på at namnet og den visuelle utforminga av det ikkje gav kjenneteiknet tilstrekkeleg distinktivitet. Kjenneteiknet nyter da ikkje sjølvstendig vern som del av Thons registrerte varemerke. Høgsterett fann vidare at «Stortorvets Gjæstgiveri» ikkje var innarbeidd som varemerke gjennom innarbeiding i den relevante omsetningskretsen i Hamar-området.
Madrikus’ bruk av namnet «Stortorvet Gjestgiveri» med tilhøyrande logo krenkte heller ikkje spesialføresegna om etterlikningsvern i marknadsføringslova, eller generalklausulen om god forretningsskikk.
Anken over frifinningsdommen i lagmannsretten blei forkasta.