Kroppsvisitasjonar under varetektsfengsling
Høgsteretts dom 28. mai 2021, HR-2021-1155-A, (sak nr. 20-178462STR-HRET), straffesak, anke over dom.
A (advokat Halvard Helle), B (advokat John Christian Elden), C (advokat Øivind Sterri) mot Påtalemakta (førstestatsadvokat Hugo Henstein)
Dommarar: Webster, Falkanger, Bergh, Østensen Berglund, Thyness
Høgsterett kom til at gjentatte kroppsvisitasjonar under varetektsfengsling var gjennomførte i strid med Den europeiske menneskerettskonvensjonen (EMK). Dei domfelte fekk kompensasjon for dette i form av utvida varetektsfrådrag.
I 2020 blei det anerkjent at den praksisen som til da hadde vore gjeldande i norske fengsel med rutinemessig kroppsvisitasjon – full avkleding med inspeksjon av heile kroppen – kunne medføre brot på EMK artikkel 3. Dette kom mellom anna til uttrykk ved at Kriminalomsorgsdirektoratet i september 2020 gjennomførte ei praksisendring og fastsette at kroppsvisitasjon ikkje lenger skulle kunne finne stad rutinemessig.
Denne saka gjaldt kroppsvisitasjonar som var gjennomførte før praksisendringa. Dei tre domfelte var kroppsvisiterte høvesvis 140, 129 og 73 gonger. Alle visitasjonane var gjennomførte på reint rutinemessig grunnlag – utan at det var gjort ei vurdering knytt til den enkelte innsette eller til omstenda i det enkelte tilfellet og heller ikkje til situasjonen i fengselet. Det låg da føre brot på EMK artikkel 3.
I samsvar med høgsterettsdommane 5. november 2020, HR-2020-2136-A og HR 2020 2137 A, blei kompensasjon gitt med éin dag ekstra varetektsfrådrag for to ulovlege kroppsvisitasjonar.
Saka bidrar til å avklare kva for krav som følger av EMK når det gjeld gjennomføring av kroppsvisitasjonar.