Rekkevidda av unntaket for «humanitær bistand» i utlendingslova § 108 sjette ledd

Dommarar: Skoghøy, Falkanger, Noer, Bergsjø, Ringnes

A hadde hatt to utlendingar med ulovleg opphald i Noreg buande hos seg i tre døgn. Spørsmålet i saka var om forholdet var omfatta av straffritaket i utlendingslova § 108 sjette ledd, som bestemmer at «[d]en som yter humanitær bistand til utlending som oppholder seg ulovlig i riket, skal ikke kunne straffes for medvirkning til ulovlig opphold». Unntaka i bokstav a og b i føresegna var ikkje aktuelle.

Høgsterett uttalte at «humanitær bistand» kan beskrivast som usjølvisk hjelp til dekning av fysiske livsnødvendigheiter og tilgrensande medmenneskelege behov. Helsehjelp og omsorgstenester, mat og klede og husvære er eksempel på bistand som er omfatta. Dersom bistanden skjer mot vederlag som utlendingen yter i form av pengar, arbeid eller tenester, er ein utanfor ramma for «humanitær bistand», i alle fall dersom gjenytinga ikkje er ubetydeleg.

Lagmannsretten konkluderte med at A ikkje hadde ytt «humanitær bistand», og grunngav dette mellom anna med at bistanden var ei venneteneste, og at utlendingane kunne ha tatt opphald på asylmottak. Høgsterett meinte at dette var basert på gal lovbruk, og oppheva domfellinga for brot på utlendingslova § 108 fjerde ledd bokstav a.

A var rettskraftig dømd i tingretten for brot på utlendingslova § 108 tredje ledd bokstav a for å ha hatt ein av utlendingane i arbeid i butikken sin éin dag, og for brot på tollova for omsetning av 1 400 ufortolla sigarettar. Høgsterett utmålte straffa for desse forholda til ei bot på 30 000 kroner.

Dommen gir rettleiing om rekkevidda av straffritaket for «humanitær bistand» i utlendingslova § 108 sjette ledd.

Les heile avgjerda