Straffutmåling for grovt bedrageri og uriktig forklaring i samband med krav om refusjon etter reglane i midlertidig forskrift om lønnskompensasjon for å avhjelpe konsekvenser av covid-19
Høgsteretts dom 21. desember 2021, HR-2021-2556-A, (sak nr. 21-135641STR-HRET), straffesak, anke over dom.
A (advokat Jon Anders Hasle) mot Påtalemakta (førstestatsadvokat Lars Stoltenberg)
Dommarar: Webster, Normann, Bergsjø, Bergh, Thyness
Både tingretten og lagmannsretten hadde fastsett straffa for brot på straffelova § 372, jf. § 371 bokstav b (grovt bedrageri) og straffelova § 221 første ledd (uriktig opplysning til offentleg myndigheit) til fengsel i ni månader. Høgsterett forkasta anken over straffutmålinga.
Den domfelte hadde fått utbetalt lønnskompensasjon frå Nav med i underkant av 500 000 kroner. Han hadde uriktig opplyst at han hadde betalt lønn til tolv personar som han hadde tilsett i verksemda si. Høgsterett kom til at straffa måtte skjerpast utover straffenivået for grovt bedrageri i tilknyting til offentlege støtteordningar. At den domfelte hadde gitt uriktige opplysningar til Nav, blei også vurdert som skjerpande.
Avgjerda har betydning ved utmålinga av straff for grovt bedrageri ved misbruk av offentlege støtteordningar.