Straffutmåling ved brannstifting i bustadblokk
Høgsteretts dom 18. mars 2021, HR-2021-604-A, (sak nr. 20-180305STR-HRET), straffesak, anke over dom.
Påtalemakta (statsadvokat Leif Aleksandersen) mot A (advokat Arild Christian Dyngeland)
Dommarar: Webster, Matheson, Ringnes, Arntzen, Steinsvik
Ein 28 år gammal mann var domfelt for brannstifting om natta i ei bustadblokk med 64 bueiningar. Brannen blei sløkt av brannvesenet, men kunne lett ha ført til tap av menneskeliv.
Lagmannsretten hadde fastsett straffa til fengsel i tre år og ni månader, og heile straffa var gjord til vilkårsstraff under føresetnad av at den domfelte gjennomførte narkotikaprogram med domstolskontroll.
Høgsterett fastsette straffa til fengsel i tre år og seks månader, men fann ingen grunn til å gjere straffa til heil eller delvis vilkårsstraff på særvilkår.
Høgsterett tok utgangspunkt i at ein ved brot på straffelova § 355, om framkalling av fare for allmenta, berre kan gi vilkårsdom under føresetnad av gjennomføring av narkotikaprogram dersom det ligg føre heilt ekstraordinære forhold på den domfelte si side. Reaksjonsforma må vere den som best tar vare på formålet om å førebygge ny kriminalitet og fremme rehabilitering, og omsynet til den alminnelege rettskjensla og formålet med straffa må ikkje med avgjerande tyngde tale imot.
I lys av alvoret og karakteren av den straffbare handlinga var forholda på den domfelte si side ikkje tungtvegande nok til å gjere heile eller delar av straffa til vilkårsstraff.
Dommen gir rettleiing om bruksområdet for narkotikaprogram med domstolskontroll.