Årsmelding 2025
for Hordaland jordskifterett
Jordskifteretten sitt samfunnsoppdrag er gjennom offentleg rettargang å leggje til rette for effektiv og rasjonell utnytting av fast eigedom og ressursar til beste for eigarane, rettshavarane og samfunnet. Me er ein problemløysar for tvistar knytt til fast eigedom og rettigheiter til eigedommar. Alle som eig ein eigedom eller har ei varig bruksrett kan krevje sak hjå oss. Jordskifterettane arbeider med saker som vert behandla etter jordskiftelova.
Å få saker behandla hjå jordskifteretten kan medverka til å finne nye løysingar som igjen kan gje fleire fordelar. Det kan gje ein privatøkonomisk gevinst, fordi eigedommane vert meir kostnadseffektive. Det gjev og ein psykososial gevinst for alle involverte, sidan det å vera involvert i ei uavklart tvist som regel er ei påkjenning. Løysingane gjev i tillegg ofte ein miljøgevinst, fordi dei tek omsyn til naturen, sosiale forhold og estetikk.
Om Hordaland jordskifterett
Hordaland jordskifterett har bemanna rettsstad på Voss og i Bergen med til saman 17 tilsette fordelt på dei to stadane. Av dette var det i 2025 6 jordskiftedommarar, 1 jordskiftedommarfullmektig, 5 tekniske utgreiarar, 4 saksbehandlarar og 1 reinhaldar.
Jordskifterettsleiar er Thorbjørn Svane.
Kontoret ved rettsstad Voss ligg i sentrum på Vossevangen og har kontor i 2. etasje i Bøndenes hus, Skulegata 11a.
I 2024 flytta me kontoret ved rettsstad Bergen. I påvente av at nye Bergen tinghus skal verte ferdig held me no til i same bygg som Gulating lagmannsrett, i Gulatings plass1, 5. etasje.
Rettskrinsen til Hordaland jordskifterett omfattar kommunane:
Askøy, Alver, Austevoll, Austrheim, Bergen, Bjørnefjorden, Eidfjord, Fedje, Kvam, Masfjorden, Modalen, Osterøy, Samnanger,
Ullensvang, Ulvik, Vaksdal, Voss og Øygarden.
Saksarbeidet – saksinngang og saksavvikling i 2025
I 2025 kom det inn 65 nye krav til behandling i domstolen, noko som er litt under gjennomsnitt. Det vart slutta 105 saker. Ved utgangen av 2025 låg det 86 saker til behandling. Eit av fokusområda i 2025 var aktiv saksstyring. Tiltak knytt til dette har vore til god hjelp for å effektivisere saksarbeidet og halde oversikt i saksavviklinga. Dei tilsette har òg i større grad teke del i den aktive saksstyringa, som har gitt gode resultat i auka saksavvikling og nedbygging av restansen.
Domstolen har i 2025 fått god hjelp frå andre domstolar til å behandle saker i vårt sokn. Dette har vore med å bidrege til at me gjekk frå 126 til 86 saker til behandling.
Rettsmekling som effektiviseringstiltak og service
Det vert satsa stort på rettsmekling og me tilbyr dette breitt i dei fleste saker. Alle rettsfastsettande krav og krav om skjønn får tilbodet om rettsmekling kort tid etter at saka kjem inn til oss.
I 2025 vart det løyst 25 saker ved hjelp av rettsmekling.
I Hordaland jordskifterett er det hovudsakleg dei tekniske utgreiarane som gjennomfører rettsmekling, og dei har alle gjennomført kurs i dette dei siste åra.
Sidan me har lang ventetid på oppstart av ordinær behandling av sakene hjå oss, er det ein stor fordel å kunne tilby partane mogelegheita til å løyse heile eller deler av krava ved rettsmekling innan kort tid.
Ynskjer du meir informasjon?
Informasjon om arbeidsoppgåvene, korleis du kan krevje sak m.m. finn du på www.jordskifte.no.
Ynskjer du informasjon om tidlegare jordskiftesaker kan du finne dette på: sejordskiftesak.domstol.no
Interesserte kan også få meir informasjon ved å kontakte jordskifteretten direkte.
Hordaland jordskifterett
Postadresse: Gulatings plass 1, 5014 Bergen
Besøksadresse Voss: Skulegata 11 A, 2.etg i Bøndenes hus
Besøksadresse Bergen: Gulatings plass 1, 5.etg
Telefon: 55 69 37 00
E-post: Hordaland.jordskifterett@domstol.no
Heimeside: www.domstol.no/jhod