Forsøk på grovt bedrageri og dokumentfalsk
Høgsteretts dom 27.03.2009, HR-2009-00703-A, (sak nr. 2009/76), straffesak, anke over dom
A (advokat Anders Brosveet) mot Den offentlege påtalemakta (kst. statsadvokat Arild Oma)
Dommarane: Bruzelius, Tønder, Bårdsen, Endresen, Stang Lund
A var i tingretten blitt dømd for forsøk på grovt bedrageri og dokumentfalsk. I samsvar med tiltalevedtaket la tingretten til grunn at han hadde prøvd å lokke namsmannen til å ta utlegg hos X AS ved hjelp av eit gjeldsbrev der han hadde forfalska underskrifta til ein tidlegare konsernsjef i selskapet. Anken til lagmannsretten gjaldt straffutmålinga, og retten forkasta anken.
Anken til Høgsterett gjaldt lovbruken, sakshandsaminga og straffutmålinga.
Høgsterett oppheva dommane og hovudforhandlingane i begge dei tidlegare instansane, sidan det forholdet som var framstilt i tiltalevedtaket, og som tingretten hadde lagt til grunn, ikkje er bedrageri etter straffelova § 270 første ledd nr. 1. Domfelling etter denne føresegna krev at den som er lokka til handling, eller den han handlar for, er utsett for tap eller fare for tap.