Straffutmåling for tilverking og oppbevaring av cannabisplantar i større omfang
Høgsteretts dom 23.04.2009, HR-2009-00879-A, (sak nr. 2009/301), straffesak, anke over dom
A (advokat John Christian Elden) mot Den offentlege påtalemakta (førstestatsadvokat Lasse Qvigstad)
Straffelova § 162 første og andre ledd
Dommarane Bruzelius, Bårdsen, Tønder, Coward, Gjølstad
Saka gjaldt straffutmåling for tilverking og oppbevaring av cannabisplantar i større omfang og med profesjonelt preg, og reiste særleg spørsmål om kor viktig stor produksjonskapasitet er, samanhalde med at produksjonsprosessen ikkje var kommen langt.
I dom 6. mars 2009 HR-2009-00548-A handsama Høgsterett momenta ved straffutmåling for tilverking og oppbevaring av narkotika ved dyrking av cannabisplantar i større omfang og med profesjonelt preg. I den saka var det aller meste av produksjonspotensialet realisert. I den nye saka var det nærmare fem gonger fleire cannabisplantar enn i saka frå 6. mars 2009, mens mengda av produsert cannabis og andre forhold var nokså like.
Tilverkinga hadde stansa på grunn av brann, og det blei lagt til grunn at modningsgrada hadde mindre å seie.
Produksjonskapasiteten tilsa at utgangspunktet for straffutmålinga skulle vere fengsel i frå tre år og seks månader til fire år. Men etter tilpassingar på grunn av at produksjonen ikkje var kommen særleg langt, og i tillegg As rolle, sette Høgsterett straffa til fengsel i tre år. Lagmannsretten og tingretten hadde sett straffa til tre år og ni månader.