Straffutmåling for grovt dopingbrotsverk og storleiken av eit inndragningsbeløp
Høgsteretts dom 23.04.2009, HR-2009-00877-A, (sak nr. 2009/300), straffesak, anke over dom
Straffeprosesslova § 321 og § 342 andre ledd nr. 3
A (advokat Gunnar K. Hagen) mot Den offentlege påtalemakta (førstestatsadvokat Lasse Qvigstad)
Dommarane: Coward, Bruzelius, Bårdsen, Tønder, Gjølstad
Anken til Høgsterett gjaldt straffutmålinga for grovt dopingbrotsverk mm. og dessutan storleiken av eit inndragingsbeløp. Utanfor anken hevda forsvararen under forhandlingane for Høgsterett at dommen i lagmannsretten og den tidlegare rettsavgjerda om berre delvis å tillate anken til lagmannsretten fremma, måtte opphevast på grunn av sakshandsamingsfeil – manglande grunngiving av avgjerda. Aktor slutta seg til dette.
Også Høgsterett var samd i ei slik oppheving og viste i hovudsak til Høgsteretts avgjerd 4. mars i år, HR-2009-00529-A, som har bakgrunn i avgjerder 19. desember 2008 av Høgsterett i storkammer. Kravet til grunngiving gjaldt også for nektinga av å fremme anken over inndragingsavgjerda, som var ein reaksjon mot straffbare forhold der også fengselsstraff var påstått – og idømd av tingretten.