Brot på byggherreforskrifta har ikkje privatrettslege verknader
Høyesteretts dom 7. juni 2022, HR-2022-1120-A, (sak nr. 21-152318SIV-HRET), sivil sak, anke over dom.
Veidekke Entreprenør AS mot Staten v/Samferdselsdepartementet (Regjeringsadvokaten v/advokat Håvard Hansen Holdø)
Etter offentleg anbod inngjekk Statens vegvesen og Veidekke Entreprenør AS i 2015 kontrakt om levering av K10 Svegatjørn–Fanavegen, ein del av ny hovudveg mellom Os og Bergen. Veidekke vart forseinka ved fleire delfristar undervegs.
Spørsmålet var om Statens vegvesens moglege brot på kravet i byggherreforskrifta § 5 – om at det skal setjast av tilstrekkeleg byggjetid – skulle få privatrettsleg verknad mellom partane, slik at dei dagmulktsanksjonerte delfristane måtte setjast til side eller forlengast.
Høgsterett kom til at moglege brot på forskrifta ikkje hadde privatrettslege verknader. Overskridingane av delfristane i kontrakten kunne såleis ikkje setjast til sides eller reviderast, korkje etter entreprisekontrakten sjølv, Norske Lov 5–1–2, effektivitetsprinsippet i EØS-retten eller avtalelova § 36.
Ein dommar dissenterte og meinte at fristane i kontrakten måtte setjast til sides – i praksis forlengast – så langt dei var i strid med kravet i byggherreforskrifta, slik at krava om dagmulkt måtte avskjerast i forlengingsperioden.
Dommen avklarar at brot på byggherreforskrifta § 5 ikkje har privatrettslege verknader.
Rettsområde: Entrepriserett. Avtalerevisjon. Effektivitetsprinsippet i EØS. Byggherreforskrifta § 5. NS 8406. Norske Lov 5–1–2. Avtalelova § 36.
Nøkkelavsnitt: 48-49, 67, 70
Dommarar: Skoghøy, Bull, Arntzen, Falch, Berg