Danske Bank frifunnen etter direktørsvindel

Høgsteretts dom 31. mai 2024, HR-2024-990-A, (sak nr. 23-101291SIV-HRET), sivil sak, anke over Borgarting lagmannsretts dom.

I. Danske Bank (advokat Olav Fredrik Perland), Finans Norge (partshjelpar) (advokat Henning Harborg) mot Edison international S.p.A. (advokat Nils Christian Langtvedt) II. Edison international S.p.A. (advokat Nils Christian Langtvedt) mot Danske Bank (advokat Olav Fredrik Perland), Finans Norge (partshjelpar) (advokat Henning Harborg)

Dagleg leiar i eit energiselskap vart i 2019 narra av eksterne svindlarar til å overføre om lag 130 millionar kroner frå selskapets konto i Danske Bank til to kontoar i Hong Kong, kontrollert av svindlarar.

Spørsmålet for Høgsterett var om banken er ansvarleg for ikkje å ha åtvara kunden mot overføringane.

Selskapet som vart svindla gjorde gjeldande at banken var ansvarleg for tapet fordi betalingstransaksjonane var uautoriserte, men fekk ikkje medhald i dette. Høgsterett kom til at betalingane var autoriserte av kunden.

Selskapet gjorde subsidiært gjeldande at Danske Bank var ansvarleg på aktløysegrunnlag sjølv om betalingane var autoriserte. Selskapet fekk heller ikkje medhald i dette. Høgsterett meinte banken korkje hadde brote plikter i lov, forskrift, direktiv eller bransjenormer, inkludert kvitvaskingsreglane.

Les avgjerda frå Høgsterett (PDF)

Rettsområde: Erstatningsrett. Finansavtalelova 1999 § 35, Finansavtalelova 2020 § 4-30

Nøkkelavsnitt: 53-54, 74-75, 79, 83

Dommarar: Falkanger, Arntzen, Høgetveit Berg, Thyness, Stenvik