Justitiarius Toril Marie Øie

Toril Marie Øie tiltredde som høgsterettsjustitiarius i mars 2016. Ho er den 20. justitiariusen i Høgsteretts 200 års verketid og den første kvinna som har dette embetet.

Justitiarius Øie er fødd i Oslo i 1960. Ho tok juridisk embetseksamen ved Det juridiske fakultetet ved Universitetet i Oslo i 1986.

Frå 1986 til 2004 var ho tilsett i Lovavdelinga i Justis- og politidepartementet – frå 1990 som lovrådgivar og frå 2000 som avdelingsdirektør og leiar for Eining for strafferett og prosess. Arbeidet i Lovavdelinga bestod i hovudsak i å førebu lovendringar, lage utgreiingar om juridiske spørsmål, ofte i form av uttalar om lovtolkingsspørsmål, og lovteknisk bistand til andre departement.

Frå 1988 til 1990 hadde Øie permisjon frå Lovavdelinga for å vere dommarfullmektig og seinare konstituert heradsrettsdommar og konstituert sorenskrivar ved Strømmen sorenskrivarembete.

I åra 1994 til 2002 hadde ho i tillegg til stillinga i Lovavdelinga ei bistilling som førstelektor II ved Institutt for offentleg rett ved Universitetet i Oslo. Her underviste ho i mellom anna strafferett, straffeprosess og sivilprosess.

Øie tiltredde som høgsterettsdommar i august 2004.

Frå 2008 til 2017 var ho styremedlem i det norske lokalstyret av Dei nordiske juristmøta. Ho har tidlegare vore fagredaktør i Norsk Lovkommentar frå 2001 til 2015 og har hatt ulike offentlege verv. Øie har skrive to lærebøker i strafferett, er medforfattar av ei kommentarutgåve til tvistelova og medredaktør av jubileumsskriftet til Høgsteretts 200-årsjubileum og festskrift til Tore Schei. Ho har i tillegg skrive ei rekke artiklar, hovudsakleg om strafferettslege eller prosessuelle emne. 

Den 9. oktober 2018 blei Øie utnemnd til Kommandør med stjerne av Den Kongelege Norske St. Olavs Orden.