Årsmelding for Høgsterett 2022
Årsmeldinga for 2022 inneheld statistikk og artiklar om Høgsteretts verksemd i 2022.
Ankar til Høgsterett i 2022
Sjølv om det generelt har vore ein nedgang i talet på saker for domstolane dei siste åra, er talet på ankar som kjem inn til Høgsterett, stabilt. I 2022 kom det inn 2155 ankar, noko som er på nivå med dei årlege ankane sidan 2017. Tala viser at høvet til å anke til Høgsterett blir nytta like ofte eller oftare enn tidlegare.
På nokre få område har det vore ein markant nedgang i innkomne saker. Det gjeld mellom anna ankar i saker om barnevern. Sjølv om det er vanskeleg å seie sikkert, kan nedgangen indikere at Høgsteretts avgjerder i lys av EMDs storkammerdom Strand Lobben mfl. mot Noreg frå 2019 gav god rettsavklaring til domstolar og rettslivet elles.
Straffesaker i Høgsterett
Behovet for rettsavklaring og rettsutvikling på strafferettsområdet oppstår særleg som følge av ny lovgiving eller endringar i samfunnet. Straffesaker med utspring i reglar vedtatt under koronapandemien er mellom eksempla frå 2022.
I 2022 har Høgsterett avgjort fleire straffesaker etter munnleg behandling i avdeling enn dei to føregåande åra, til saman 55 saker. Til samanlikning blei det behandla 30 straffesaker i avdeling i 2021 og 43 straffesaker i avdeling i 2020.
Sivile saker i Høgsterett
I 2022 behandla Høgsterett 57 sivile saker. Ei rekke saker gjaldt forbrukarrettslege spørsmål, mellom anna spørsmål om kva ansvar ein bankkunde hadde etter BankID-svindel. Det blei også avgjort fleire saker om bustadkjøp.
Strøyming av rettsmøte
Det siste året har vi lagt ned mykje arbeid i å formidle avgjerder og saker på ein måte som er enklare å forstå for publikum og presse. I 2023 kan vi for første gong også tilby strøyming av enkelte rettsmøte, slik at ein kan følge med via nettsida vår. Høgsterett behandlar saker frå heile landet og har lenge jobba for å kunne strøyme. Det er derfor svært gledeleg at Stortinget i fjor sommar gav ein lovheimel for dette. Høgsterett jobbar no med å få på plass teknisk utstyr og lage retningslinjer for dei sakene strøyming kan vere aktuelt for. Den første saka som vil bli strøymd på heimesida vår, er plenumssaka om Svalbardtraktaten, som skal behandlast 24.–27. januar. Denne saka vil bli strøymd med ei enkel teknisk løysing, i påvente av permanent utstyr i rettssalane.