Alimusriekti

Dán siiddus gávnnat oanehis dieđuid Alimusrievtti funkšuvnnain ja bargguin.
Eanet dieđuid gávnnat
Alimusrievtti neahtabáikkis.

Riika bajimus duopmostuollu

Vuođđolága § 88:s dadjo ahte «Alimusreikti dupme maŋimuš instánssas». Dat mearkkaša ahte Alimusriekti lea Norgga alimus duopmostuollu ja olles riika lea dan doaibmaguovlu. Oktan Stuorradiggin ja Ráđđehusain dahká Alimusriekti rikka bajimus stádaorgána. Alimusrievttis lea oktiibuot guoktelogi duopmára ja sin bargobáiki lea Alimusrievtti viessu Oslos. Duopmostuolu jođiheaddji namahus lea alimusriektejustitiárius.

Eanáš áššin bidjo diggi viđain duopmárin. Dehálaš áššit meannuduvvojit stuorrakámmáris (oktanuppelohkái duopmára). Erenoamáš dehálaš áššiin oasálastet buot duopmárat.

Alimusriekti guoddalanlávdegottis lea golbma alimusriekteduopmára, ja buot duopmárat oasálastet nu gohčoduvvon molsuortnega vuođul.

Áššesuorgi

Alimusriekti lea guoddalanduopmostuollu mii meannuda guoddalemiid mearrádusain mat leat dahkon vuolit duopmostuoluin, sihke siviila áššiin ja ráŋggáštusáššiin ja sis lea váldi buot riektesurggiin. Alimusriekti ii meannut sivalašvuođagažaldaga ráŋggáštusáššiin. 

Áššemeannudeapmi

Buot áššit Alimusriektái meannuduvvojit vuos guoddalanlávdegottis. Lávdegoddi cealká mearrádusaid guoddalemiiguin riektecealkámušain ja mearrádusain vuolit duopmostuoluin. Guoddaleamit mat gusket duomuide, ii sáhte daid ovddidit Alimusriektái guoddalanlávdegotti mearrádusa haga. Guoddalanlávdegoddi sille dasto buot guoddalemiid láhkamearriduvvon eavttuid vuođul ja mearrida ahte leago ášši nu mearkkašahtti ahte Alimusriekti berre mearridit dan. Áššemeannudeapmi guoddalanlávdegottis lea čálalaš, ja mearrádusat dahkkojit áššedokumeanttaid vuođul.

Riika alimus duopmostuollun galgá Alimusriekti riektečielggádit surggiid gos dat juridihkalaš njuolggadusat leat eahpečielgasat. Alimusrievttis lea maid ovddasvástádus riekteovdáneapmái, lágadahkii rámmaid siskkobealde, gos ođđa servodatčuolmmat gáibidit dan. Áššit mat bohciidit prinsihpalaš gažaldagaid mat leat olggobeale dan konkrehta áššedili, besset danin dávjá meannudeapmái.

Alimusrievttis leat diggešiehtadallamat masá álo njálmmálačča ja lea rabas buohkaide. Muhto doppe dábálaččat ii leat duođaštusovdánbuktin oasehasa- dahje vihtančilgehusain nugo diggegottis ja lágamánnerievttis. Alimusriekti ii mana  diđošteapmái/geahčadeapmái ášši oktavuođas.

Mearrádusaid almmuheapmi

Mearrádusat dahkon Alimusrievttis ja Alimusrievtti guoddalanlávdegottis almmuhuvvojit Norsk Rettstidene bláđđái ja Lovdatai. Ođđa mearrádusaid fitnet nuvttá Lovdatas  (www.lovdata.no) golbma mánu. Oanehisveršuvnnaid ođđa mearrádusain gávnnat www.hoyesterett.no.

Siidu lea maŋimuš dáhkiduvvon: 09.04.2018, kl. 14.12