Otná áššit

Áššelistu

Unjárgga meahcceriggodagat dievasčoahkkináššin

Alimusriekti lea cealkán duomu sisdoalu hárrái áššis mii guoská báikegotteolbmuid árbevirolaš kollektiiva geavahanvuoigatvuođaide Finnmárkkuopmodaga eatnamis Unjárgga gielddas. 

Finnmárkkuopmodaga guoddaleapmi vuhtiiváldojuvvo. 

Finnmarkseiendommen - domsavsigelse i plenum 93.2018

Ášši nr. 2017/860, siviila ášši, duomu guoddaleapmi. 

Alimusrievtti dievasčoahkkima duopmu Finnmárkku meahcceriggodagaid hálddašeami hárrái
Bearjadaga njukčamánu 9. b. 2018

Finnmárkkuopmodat Unjárgga Gilisearvvi vuostá.

Alimusriekti lea odne cealkán duomu áššis báikegoddelaččaid ásahuvvon kollektiivvalaš geavahanvuoigatvuođaid sisdoalu hárrái Finnmárkkuopmodaga eatnamiin Unjárgga gielddas.   

Ášši gusto čielggadit sápmelaččaid ja earáid geavahanvuoigatvuođaid finnmárkkulága 5. kapihttala vásedin proseassanjuolggadusaid mielde. 

Finnmárkkuopmodaga guoddaleapmi dorjojuvvui. 

Finnmárkkuopmodaga guoddaleapmi vuhtiiváldojuvvo

Duopmu lea ovttajienalaš. 

Finnmárkokomišuvdna almmuhiiguovvamánu 13. b. 2013 raporttas Unjárgga gieldda eatnamiid vuoigatvuođaid hárrái. Komišuvdna gávnnaha ahte gieldda álbmogis lea álgoálgosaš vuoigatvuohta iešguđet meahcástallanvugiide. Dán geavaheamis lea iehčanas vuođđu finnmárkkulága bálddas. Seammás konkluderii komišuvdna ahte Orohaga 6/5D siiddadoalliin lea dábálaš geavahanriekti boazodollui. 

Viehka olus Unjárgga gieldda álbmogis leat mearrasápmelaččat. Unjárgga gilisearvi ceggii dihto gielddaoasi báikegoddelaččaid beales ášši Finnmárkku meahcceduopmustuolu ovdii gáibádusain ahte stáđásmuvvon geavahanvuoigatvuođat maiddái fátmmastit vuoigatvuođa hálddasit luondduriggodaid maidda geavahanvuoigatvuođat laktášuvvojit. Nuppeláhkai daddjon, de gusto ášši dáid vuoigatvuođaid bajit dási stivremii. Gáibádus gusto earret eará vuoigatvuhtii hálddašit /stivret bivddu dán gielddaoasi siste. Čuoččuhus fátmmasta ahte Finnmárkkuopmodagas (FeFo) ii galgga dan guoskevaš guovllu siste leat vuoigatvuohta čađahit hálddašeami finnnmárkkulága dábálaš njuolggadusaid mielde. 

Meahcceduopmustuolu duomus ođđajagemánu 23. b. 2017 oaččui Unjárgga gilisearvi mealgadii dohkkehuvvot ovddiduvvon gáibádusaid. FeFo guoddalii duomu Alimusriektái. Sihke meahcceduopmustuolu ovddas ja Alimusrievtti ovddas lea Orohat 6/5D dorjon FeFo ja dovddahan ahte dáhttu finnmárkkulága hálddašanvuogádaga leat gustojeaddjin. Alimusrievtti ovddas lea Álddanjárgga ja birrasa gilisearvige (Meskelv og omegn bygdelag) dorjon FeFo. 

Duomus deattuhuvvo ahte báikegoddelaččaid geavahanvuoigatvuođat leat iehčanas vuoigatvuođat mat leat álgoálgosaš lunddot ja nu dagaha sierra gáhttema. Dát mielddisbuktá earret eará ahte FeFo hálddašeamistis ferte vuoruhit báikkálaš geavaheaddjiid go lea riggodatvánisvuohta. Muhto Alimusriekti lea cealkán ahte báikegoddelaččaid historjjálaš geavahanvuoigatvuođaid atnin ii leat leamaš dakkárin ahte maiddái livččii stáđásmuvvon vuoigatvuohta hálddašit luondduriggodagaid.   

Dán árvvoštallamis deattuhuvvui báikegoddelaččaid geavaheami mihtilmasvuohta,  buohtastahttojuvvon earret eará daiguin daguiguin maid stáhta lea doaimmahan dainna vuođuin ahte lea atnán iežas eaiggádin. Alimusriekti čujuhii seammás dasa ahte maiddái boazodoallu ja muđui báikegoddelaččat guđet ásset olggobeale nággoguovllu sakka muddui leat geavahan ja geavahit guovllu luondduriggodagaid.  

Alimusriekti guorahallá duomus álbmotrievttálas regeliid mat suodjalit eamiálbmotvuoigatvuođaid, erenoamážit ILO-soahpamuša nr. 169 eamiálbmogiid ja čearddalaš álbmogiid hárrái iešmearrideaddji riikkain. Alimusrievtti loahppacealkka lea ahte báikegoddelaččaid geavahanvuoigatvuođaid dovddasteapmi ja áimmahuššan, nu go válddahuvvon duomus, ii leat rihkkumin álbmotrievtti. 

FeFo proseassafámohas lea Alimusrievttis deattuhan ahte báikegoddelaččaid geavahanvuoigatvuođat Unjárggas gáržžidit FeFo eaiggátráđđejumi doaimmaheami finnmárkkulága mielde, ja seammás čatnet FeFo das mo boahttevaččat hálddašit gieldda meahcceriggodagaid. Dát ráddjejumit mielddisbuktet earret eará ahte FeFo ii sáhte váldit mávssu báikegoddelaččaid geavahanvuoigatvuođaid atnimis eanet go dan maid lea dárbu gokčat FeFo hálddašangoluid. Alimusriekti lei ovttaoaivilis dán lahkoneapmái. Alimusriekti seammás celkkii ahte FeFo hálddašeami ja stáđásmuvvon vuoigatvuođaid gaskasaš čađaheapmi lagabut heiveheami hárrái ii leat áššáigullevaš nu go dat lea prosederejuvvon Alimusriektái. 

Gulahallanolmmoš:

Svein Tore Andersen

Diehtojuohkinráđđeaddi Alimusriekti

Tlf.  22 03 59 82

Mob 93 00 77 43

 

Alimusrievtti váldodoaibma

Alimusrievtti váldodoaibma lea bargat riektečielggadeami ja riekteovdáneami ávkin.

Alimusriekti gieđahallá buotlágan áššiid, sihke siviila áššiid, ráŋggáštusáššiid, hálddahusáššiid ja dakkár áššiid mat čuoččaldahttet vuođđolágalaš gažaldagaid.

Norgga Alimusriekti dáhttu ahte duopmostuolu doaimmas lea rabasvuohta ja geahčadanvuoigatvuohta.