Justitiarius Toril Marie Øie

Toril Marie Øie álggii alimusriektejustitiariussan bargat njukčamánus 2016.  Son lea 20. justitiarius Alimusrievtti 200 jagi doaibmanáiggis ja lea vuosttas nissonolmmoš dán ámmáhis.

Justitiarius Øie riegádii Oslos 1960:s.  Son čađahii juridihkalaš ámmáteksámena Oslo Universitehta juridihkalaš fakultehtas 1986:s.

1986 rájes gitta 2004 rádjai barggai son Justiisa- ja politiijadepartemeantta Láhkaossodagas – 1990 rájes láhkaráđđeaddin ja 2000 rájes ossodatdirektevran ja ráŋggáštusrievtti ja proseassa ovttadaga jođiheaddjin.  Su bargu Láhkaossodagas lei ráhkkanahttit láhkarievdadusaid, hábmet juridihkalaš gažaldagaid dáfus smiehttamušaid, dávjá láhkadulkongažaldagaide cealkámušaid buktit, ja láhkateknihkalaččat veahkehit eará departemeanttaid.

Áigodagas 1988-1990 lei Toril Marie Øies virgelohpi Láhkaossodagas bargat duopmárfámohassan ja maŋŋel sadjásaš gielddariekteduopmárin ja Strømmen sundidoaimmahaga sadjásaš sundin.

1994 rájes 2002 rádjai lei sus lassin Láhkaossodaga virggi, maiddái oasseáiggevirgi Oslo Universitehta almmolaš rievtti instituhta vuosttašlektorin II. Son oahpahii ee. ráŋggáštusrievttis, ráŋggáštusproseassas ja siviilaproseassas.

Son álggii alimusriekteduopmárin borgemánus 2004.

Justitiarius Øie lei stivrralahttun Davviriikkaid juristačoahkkimiid Norgga báikkálaš stivrras 2008 rájes gitta 2017 rádjai.  Son lei maiddái Norsk lovkommentar –fágaredaktevran 2001 rájes gitta 2015 rádjai ja sus leat leamaš iešguđetlágan almmolaš luohttámušdoaimmat. Son lea čállán guokte oahppogirjji ráŋggáštusrievttis, lea leamaš mielde čállimin riidolága várás kommentáraid, ja lea leamaš mielde doaimmaheamen Alimusrievtti 200-jagi ávvučálusčoakkáldaga ja Tore Schei ávvučállosiid. Son lea maiddái čállán olu artihkkaliid, erenoamážit ráŋggáštusrievtti ja proseassa fáttáid birra.