Fuolahusa badjelasváldin

Duopmárat: Coward, Zimmer, Bruzelius, Gjølstad ja Smith

Sosiála áššiid fylkkalávdegoddi mearridii juovlamánu 1999 váldit badjelasas fuolahusa dalle badjelaš jahkásaš mánnái ja su lágidit biebmoruktui, ja seammás mearriduvvui váhnemiid ovttastallanvuoigatvuođa birra. Mearrádus nannejuvvui gielddarievtti ovttajienalaš duomus. Lágamánneriekti nannii gielddarievtti duomu, oktan guovtti juridihkalaš duopmára sierraoaiviliin.

Lágamánnerievtti duomu- nu guhkás go lei guoddaluvvon – nannii Alimusriekti.

Alimusrievttis lei hirbmat vuđolaš ja viiddis áššedovdi cealkámuš, maid Alimusriekti oaivvildii fertet nannosit deattuhuvvot. Alimusriekti bijai vuođđun ahte máná fuolahus, erenoamážit psyhkalaš fuolahus, ii lean eisege doarvái su vuosttas guhtta mánu, ahte dát lei leamaš hirbmat vahágahttin sutnje, ja ahte son danne dárbbašii erenoamáš fuolahusa. Ruovttu olgguldas dilli lei čielgasit buorránan maŋŋil go eatni dálá náittosguoibmi bođii dállui. Muhto psykologalaš eavttut gullevašvuhtii ja oktavuhtii eai lean velá doarvái, ja fertii bidjat vuođđun ahte mánáidsuodjalanlága § 4-12 vuosttas lađđasa a bustáva eaktu – ahte leat duođalaš váillit beaivválaš fuolahusas dahje persovnnalaš oktavuođa ja oadjebasvuođa ektui maid mánná dárbbaša – ledje devdojuvvon. Fuolahusa badjelasas váldin atnui dasto dárbbašlažžan, dan áddejumis ahte váilliid ii sáhte buhtadit eará doaimmaid bokte, erenoamážit go eadni ii mieđihan leat váttisvuođaid. Ovdandoallan ahte biebmoruktui bidjan gáidadii máná sámi báikegottis, ii deattuhuvvon olus nugo ášši dalle lei, earret eará go biebmoáhččisge lei sámi duogáš. Alimusriekti čujuhii muđui dasa ahte lei duohta várra ahte máná ovttastallan áhčiin šattašii váttisin čađahit jus son fas fárrehuvvošii eatni lusa.