Boazologu unnidit
Alimusrievtti duopmu juovlamánu 21. b. 2017, HR-2017-2428-A, (2017-981), siviila ášši, duomu guoddaleapmi
Stáhta, Eanadoallo- ja biebmodepartemeanta bokte (Ráđđehusadvokáhta, advokáhta Stein-Erik Jahr Dahl bokte – geahččaleamis) Rievttálaš veahkki: advokáhta Marius Emberland) vuostá Jovsset Ante Iversen Sara (advokáhta Trond Pedersen Biti)
Duopmárat: Bergsjø, Falch, Bergh, Webster, Indreberg
Lea go boazologuvuolideami gohččun vuostá SP 27. artihkkala unnitlogusuodjaleami ja/dahje EMK P1-1 eaiggáduššansuodjaleami. Duopmu juovlamánu 21. b. 2017.
Alimusriekti gávnnahii 4-1 sierraoaiviliin ahte mearrádus unnidit ealu 75 bohccui lei fámolaš, go dat ii rihkkun boazoeaiggáda vuoigatvuođaid SP 27. artihkkala iige EMK P1-1 mielde.
Jagis 2013 biddjojuvvui orohahkii 20 Fálá bajimus boazolohku 2000 bohccui váiddameannudeami maŋŋil. Siidaoasit gohččojuvvo boazodoallolága § 60 goalmmát lađđasa mielde unnidit ealuid gorrelogu mielde. Ovtta siidaoassái mearkkašii dát vuolidit 75 bohcco rádjai. Lágamánneriekti lei vuođđun bidjan ahte ii sáhttán doaimmahit gánnáhahttin ná vuollegis boazologuin, juoga maid Alimusriekti fertii bidjat vuođđun.
Eanetlohku gávnnahii ahte siidaoasi vuoigatvuođat SP 27. artihkkala mielde eai lean rihkkojuvvon. Árvvoštallamis deattuhii eanetlohku earret eará dan ahte mudden lea leamaš boazodoalliid beroštumi mielde, ja ahte das lea govttolaš ja objektiivva vuođuštus. Eanetlohkui lei maiddái guovddáš áššin ahte boazodoallolága vuođđočoavddus lea ahte siida ieš sáhttá mearridit mo galgá unnidit boazologu, seammás go sáhttá suddjet daid boazodoalliid geain lea uhcimus bohccot bijadettiin bajimus boazologu juohke siidaoassái.
Unnitlohku oaivvildii ahte SP 27. artihkal lei rihkkojuvvon go smávit siidaoasit eai lean suddjejuvvon vuolideami vuostá, nugo láhkalávdegoddi, Sámediggi ja Norgga Boazosápmelaččaid Riikkasearvi ledje áigun.
Ovttajienalaš Alimusriekti oaivvildii ahte siidaoasi vuoigatvuođat eai lean rihkkojuvvon EMK P1-1 mielde.
Duopmu oaivada SP 27. artihkkala unnitlogusuodjaleami ja EMK P1-1 eaiggáduššansuodjaleami olámuttu.