Objektiivvalaš ovddasvástádus bohccuid vahágahttima ovddas
Alimusrievtti duopmu miessemánu 9. b. 2018, HR-2018-872-A, (ášši nr. 2017/1668), Femund sitje (advokáhta Knut Helge Hurum) vuostá Vidar Fredheim, Jonas Jensen Midtdal, Stian Nylend , Jens Narjord, Gunn Tengesdal, Anders A Hodøl, Rødalen fellesseter, Erik Jachwitz, Per Inge Nyvoll, Per Broen (advokáhta Øyvind Kraft)
Duopmárat: Berglund, Ringnes, Bergh, Høgetveit Berg, Matningsdal
Alimusriekti belohahkii fámohuhtii eanajuohkinbajitrievtti ja lágamánnerievtti mearrádusaid buhtadussii šattu vahágahttima ovddas mas sivvan lei ahte bohccot ledje boahtán gilvvagittiide, go mielváikkuheami dahje ložžema birra ii lean doarvái ságaškuššojuvvon.
Erenoamáš dálkkiid geažil 2012 čavčča ledje viehka olu bohccot boahtán gilvvagittiide. Dát bilidii šattu, ja guovllu eanadoallit ozahedje guohtunárvvošteami. Lohkásii sis mieđihuvvui buhtadus.
Ášši gažaldat lei ahte lea go boazodoallolága § 67 mearrádus objektiivvalaš solidáralaš ovddasvástádusa birra boazodoalliide vuostá sápmelaččaid suodjaleami eamiálbmogin Vuođđolága ja álbmotrievttálaš regeliid mielde. Alimusriekti ii čoahkkáigeassán dán gažaldagas, muhto čujuhii dasa ahte mearrádusa fertii dievasmahttit vahátbuhtaduslágain §§ 5-1 ja 5-2 mielváikkuheami ja ložžema birra. Dáid diliid eai lean doarvái digaštallan eanajuohkinbadjerievttis eaige lágamánnerievttis, ja mearrádusaid fertii fámohuhttit dáid čuoggáin.
Alimusriekti dovddahii leat unohassan go Sámevuoigatvuođalávdegotti 2007 evttohus buhtadusregeliid revišuvnna birra, ii lean čuovvuluvvon, ja čujuhii ahte ON olmmošvuoigatvuođalávdegoddi gieskat dovddahii dan seamma.
Ášši oaivada boazodoallolága § 67 áddejumi objektiivvalaš ovddasvástádusa hárrái bohccui vahágahttima ovddas ja cealká ahte dán galgá dievasmahttit vahátbuhtaduslága mearrádusaiguin.