Bajimus boazologu mearrádusa fámolašvuohta
Alimusrievtti duopmu juovlamánu 19. b. 2019, HR-2019-2395-A, (ášši nr. 19-048745SIV-HRET), siviila ášši, duomu guoddaleapmi.
Orohat 13 (advokáhta Trond Pedersen Biti) vuostá Per Nils Ottar Anti (advokáhta Brynjar Østgård)
Duopmárat: Møse, Bergsjø, Høgetveit Berg, Thyness, Steinsvik
Okta orohat lei mearridan doallonjuolggadusaid oktan mearrádusaiguin ahte bajimus boazolohku lea orohaga áidna geassesiidda juohke siidaoasis 650 bohcco. Máŋgga siidaoassái mearkkašii dát ahte sii fertejedje vuolidit boazologu sakka, ja earát fas besse lasihit sin boazologu.
Boazodoalli guhte mearrádusa mielde fertii vuolidit boazologus 1400 bohccos 650 bohccui, vásttostii ahte sáhtii dákkár mearrádusa dahkat almmá buot siidaosiid guorraseami haga ja ovdandoalai ahte boazolohkovuolideami fertii čađahit gorrelogu vuolidemiin buot siidaosiid gaskkas. Son ovdandoalai velá ahte mearrádus rihkkui eaiggáduššansuodjaleami Eurohpalaš olmmošvuoigatvuođakonvenšuvdna vuosttas lassebeavdegirjji 1. artihkkala (EMK P1-1) mielde.
Alimusrievtti eanetlohku (golbma duopmára) gávnnahedje seamma go lágamánneriekti ahte orohaga mearrádus lei fámoheapme. Unnitlohku (guokte duopmára) oaivvildedje ahte mearrádus lei fámolaš, iige dat rihkkun EMK P1-1.
Duopmu čielggada boazodoallolága § 60 njealját lađđasa olámuttu mo mearridit bajimus boazologu juohke siidaoassái boazolohkovuolideami čađahettiin.