Sámelága oppalaš njuolggadusat mat gusket vuoigatvuođaide geavahit sámegiela guoská maiddái duopmostuoluide, lassin addet mearrádusat sámelága § 3-4 viiddis vuoigatvuođaid geavahit sámegiela riekteásahusas. Finnmárkku meahcceduopmostuolus doaibmá dat dán láhkai:
1.Juohkehaččas lea vuoigatvuohta sámegillii ovddidit proseassačállosiid oktan mildosiin, čálalaš duođaštusaid dahje eará čálalaš oktavuođaid sámegillii. Jos duopmostuollu áigu gaskkustit oktavuođa vuostebeallái, de doaimmaha dat jorgalit daid dárogillii. Jorgaleami lea vejolaš hilgut jus vuostebealli miehtá dasa.
2. Juohkehaččas lea vuoigatvuohta váldit njálmmálaččat oktavuođa duopmostuoluin sámegillii, ovdamearkadihti ovddidit stevdnema, vástaga dahje guoddaleami oktavuođas. ( Láhka dadjá ná: Juohkehaččas lea vuoigatvuohta váldit njálmmálaččat oktavuođa duopmostuoluin jus lágastanláhka addá vejolašvuođa dasa). Son guhte váldá oktavuođa , sáhttá gáibidit ahte čállojuvvo sámegillii. Dákkár gáibádus ii rihko mange áigemeari. Jus duopmostuollu galgá ovddidit čujuhusa vuostehassii, de jorgaluvvo dat dárogillii. Jorgaleami sáhttá hilgut jus vuostebealli miehtá dasa.
3. Juohkehaččas lea vuoigatvuohta sámástit dikkiin. Jos muhtun gii lea mielde šiehtadallamiin ii máhte sámegiela, de geavahuvvo dulka gean diggi lea nammadan dahje dohkkehan.
4. Go oasálaš gáibida, de sáhttá rievtti ovdaolmmoš mearridit ahte šiehtadallangiella galgá leat sámegiella. Jus muhton gii oasálastá šiehtadallamiin ii máhte sámegiela, geavahuvvojit tulkkat maid riekti lea nammadan dahje dohkkehan.
5. Jos sámegiella lea šiehtadallangiella, de sáhttá rievtti ovdaolmmoš mearridit ahte maiddái diggegirjáige čállojuvvo sámegillii. Duopmostuollu doaimmaha jorgaleami dárogillii.
6. Duopmostuollu bearráigeahččá ahte diggegirjjit mat leat čállojuvvon dárogillii, jorgaluvvojit sámegillii go áššái gulli bealli nu gáibida. Dákkár gáibádus ii rihko mange áigemeari.