4. čielggadanguovlu Kárášjohka – komišuvnna bargu boazodoalu siskkáldas riektediliin

Komišuvnna čielggadeapmi boazodoalu siskkáldas riektediliid birra lea ráddjejuvvon daidda vuoigatvuođagáibádusaide mat leat ovddiduvvon komišuvdnii. Dát čuovvu Finnmárkokomišuvnna ja Finnmárkku meahcceduopmostuolu láhkaásahusa § 5:s (dárogillii). Buohkat geat Kárášjogas leat ovddidan dákkár vuoigatvuođagáibádusa, ožžot áššiset čielggaduvvot. Gáibáduslisttu gávnnat dáppe. Geahča maiddái čuoggá 5.3 (s. 59-60) komišuvnna vuosttas oasseraporttas Kárášjoga čielggadanguovllus.

Dan raporttas Komišuvdna konkluderii ahte Kárášjogas lea boazodollui buot eatnamiin maid boazodoalloláhka definere boazodoalloguovlun, sajáiduvvan dábálaš geavahanvuoigatvuohta dološ áigásaš geavaheami vuođul. Geahča raportta čuoggáid 7.3.9.2 (s. 215-216). Dán vuoigatvuođas lea dat sisdoallu mii boahtá ovdan boazodoallolágas, ja mielddisbuktá ahte eanaeaiggát ii sáhte hálddašit eaiggáduššanrievttis dan láhkai ahte dat hehtte badjeolbmuid ávkkástallat boazodoallovuoigatvuođa.

Boahttevaš oasseraportta fáddán lea boazodoallovuoigatvuođa juohkin siskkáldasat boazodoalus gaskkal iešguđetge siiddaid. Eambbo konkrehta sáhttá dadjat ahte lea sáhka guohtonrájáin ja makkár siiddain leat erenomáš guohtunvuoigatvuođat guhte guovlluin Kárášjogas.

Komišuvnnas lea Finnmárkolága § 32 (dárogillii) mielde ovddasfástádus háhkat relevánta dieđuid áššiin maid komišuvdna čielggada, ja dan dihtii manná ollu áigi guorahallat boazodoallohálddahusa arkiivadieđuid. Komišuvdna lea maid váldán oktavuođa máŋgasiin geat leat ovddidan vuoigatvuođadieđáhusa, ja jearran sis geavaheami, áiddiid, barttaid jna. birra.

(05.03.2022)