Boazodoalu siskkáldas vuoigatvuođagažaldagat– áššegolut

Invalid Date, Finnmárkokomišuvdna/ Finnmarkskommisjonen

ill.
Govven: Frank Ingilæ

Áššegolut maŋŋá komišuvnna gieđahallama 

Finnmárkokomišuvdna sáhttá čielggadit boazodoalu siskkáldas vuoigatvuođa-gažaldagaid dušše daid oktavuođain go oktage geas lea rievttálaš beroštupmi oažžut ášši čielggaduvvot gáibida dan. Dat mearkkaša ahte dat guhte ovddida ášši komišuvdnii, sus ferte leat áigeguovdil ja geavatlaš beroštupmi oažžut čielggaduvvot guohtonrivttiid guovllus mas áššis lea sáhka. Finnmárkokomišuvnna čielggadeapmi ii mávsse maidige. 

Riiddut boazodoalu siskkáldas riektegažaldagaid hárrái maid komišuvdna lea čielggadan, sáhttet ovddiduvvot Finnmárkku meahcceduopmostullui. Jus oktage áššeoasálaš ovddida ášši viidásabbo Meahcceduopmostullui, de gal čoggojit áššegolut. 

Finnmárkolága § 43:s leat njuolggadusat dasa ahte stáhta muhtun dilálašvuođain gokčá áššeoasálačča dárbbašlaš áššegoluid áššiin mat gieđahallojit Meahcceduopmostuolus. Mearrádusat gustojit daid áššiin mas Finnmárkkuopmodat (FeFo) lea áššeoasálaš. 

Boazodoalu siskkáldas vuoigatvuođaáššiin ii leat FeFo áššoasálaš. Dasto ferte áššegoluid gažaldaga árvvoštallat riidolága 20. kapihttala dábálaš njuolggadusaid vuođul. 

Nuba eai sáhte ge áššeoasálaččat atnit vuođđun ahte stáhta gokčá dárbbašaláš áššegoluid go Meahcceduopmostuollu gieđahallá boazodoalu siskkáldas riidoáššiid. Riidolága váldonjuolggadus lea ahte áššeoasálaš guhte vuoitá ášši, sáhttá gáibidit ahte vuostebealálaš buhtada su dárbbašlaš áššegoluid.

Siskkáldas riektegažaldagaid gieđahallan eanajuohkinrievttis dahje diggerievttis 

Finnmárkokomišuvnna konklušuvnnain eai leat riektefápmováikkuhusat, nu mo duomuin leat. Dat mearkkaša ahte áššeoasálaččat sáhttet maŋŋá komišuvnna gieđahallama ovddidit ášši diggegoddái, jus ášši ii leat ovddiduvvon Meahcceduopmostullui. Muhtun boazodoalu siskkáldas gažaldagaid sáhttá maid ovddidit eanajuohkinriektái. Earret eará sáhttá eanajuohkinriekti čielggadit dáláš vuoigatvuođaid vuoigatvuođalaččaid gaskkas. 

Diggegotti áššiid olis regulerejuvvojit áššegoluid gažaldagat riidolága 20. kapihttala dábálaš njuolggadusaid vuođul. Dat mearkkaša ahte áššegollogažaldat gieđahallo seammá láhkai go Meahcceduopmostuolus. Eanajuohkinrievtti áššiin regulerejuvvo áššegoluid ja divvagiid gažaldat eanajuohkinlága 7. kapihttala njuolggadusaid vuođul.