Komišuvnna čielggadanbarggu stáhtus

Finnmárkokomišuvdna lea dál čielggadeamen 55 vuoigatvuođadieđáhusa mat leat boahtán 7. čielggadanguovllus Deanus/Deanuvuonas. Dan sivas go bohte máŋga ođđa dieđáhusa (15 dieđáhusa) skábman 2022, čielggadanbargu ádjána guhkit go komišuvdna lei vuordán. Plána lea almmuhit raportta jagis 2025.

8. čielggadanguovllus Guovdageainnus leat dán rádjái boahtán 49 vuoigatvuođadieđáhusa. Dain leat 27 dieđáhusa boazodoalu siskkáldas dilálašvuođaid birra. Njukčamánus dán jagi komišuvdna pláne čielggadanguovllu viidásat proseassa ovttas beroštusovddasteddjiiguin, ja jurdda lea álggahit gulaskuddančoahkkimiid dán jagi.

9. čielggadanguovllus Porsáŋggus gárvejuvvo áššedovdičielggadeapmi geavaheami ja riekteoainnuid birra dán giđa. Čielggadeapmi almmuhuvvo komišuvnna neahttasiidduin. Áššedovdičielggadeapmi lea komišuvdnii oassin fáktádiehtovuođus čielggadanguovllus.

10. čielggadanguovllus Čorgašis/Spierttanjárggas áššedovdit čađahit jearahallamiid dán jagi.

Buot álggahuvvon čielggadanguovlluin komišuvdna háhká dađistaga dieđuid almmuhuvvon vihtaniin/árbedihttiin.