Ođđa guovllu álggaheapmi: Čorgaš/Spierttanjárga

Invalid Date, Vigdis Beate Johansen

illustrasjonsbilde

Finnmárkokomišuvdna almmuha golggotmánu 07. beaivve 2022 ođđa čielggadanguovllu: 10. guovllu Čorgaša/Spierttanjárgga.

Vuoigatvuođaid kártemii gullet eatnamat Gáŋgaviikka gielddas ja Davvesiidda gielddas ja maiddái dan oasis Davvinjárgga gielddas mii lea Spierttanjárggas maid Finnmárkkuopmodaga (FeFo) válddii háldosis Statskog SF:s Finnmárkolága fápmui bidjamiin suoidnemánu 1.b. 2006. Kártenbargu fátmmasta maiddái mearraluossabivdosajiid maid FeFo hálddaša, mearraguovlluid Lágesvuonas, guovlluid ráddjejuvvon Deanuvutnii (7. čielggadanguovlu) ja Davvenjárgga gieldda. Komišuvdna galgá maiddái čielggadit mearrabivdosajiid ja boazodoalu siskkáldas vuoigatvuođagažaldagaid jos oktage geas lea rievttálaš beroštupmi gáibida dan, vrd. Finnmárkolága § 29 vuosttaš lađđasa ja Finnmárkokomišuvnna ja Meahcceduopmostuolu § 5 láhkaásahusa.

Diehtojuohkin

Dáid beivviid sáddet reivve bokte dieđu almmuheami birra guovllu servviide, ovttastusaide ja organisašuvnnaide.

Komišuvdna áigu lágidit diehtojuohkinčoahkkimiid guovllus. Čoahkkimat almmuhuvvojit sierra.

Dieđihit vuoigatvuođaid čielggadeapmái

Vuoigatvuođalaččat 10. guovlu Čorgaš/Spierttanjárga ávžžuhuvvojit dieđihit vuoigatvuođaid Finnmárkokomišuvdnii, ja geavat áinnas dán skovi.

Komišuvnna bargu

Finnmárkokomišuvdna kárte Finnmárkkuopmodaga (FeFo) eatnamiid dálá geavahan- ja eaiggáduššanvuoigatvuođaid mat leat háhkkojuvvon guhkesáiggi geavaheami vuođul ja mat eai leat vel formálalaččat rievttálaččat dohkkehuvvon.