Manne galgá notarius publicus dokumeantta duođaštit?
Dokumeanttaid maid áiggut geavahit eará riikkain, sáhttet gáibiduvvot notariusduođaštusa. Dábálaččat gáibidit olgoriika eiseválddit, organisašuvnnat dahje fitnodagat dan. Dávjá dárbbašat duođaštusa dokumeanttas, nugo apostilla Stáhtaáittardeaddjis dahje legaliserema Olgoriikkadepartemeanttas.
Fertet go várret áiggi oaččun dihti notarius-duođaštusa?
Muhtun diggegottiin fertet várret áiggi, ja eará diggegottiin sáhtát fas boahtit rabasáiggis soahpamuša haga.
Váldde mielde lobálaš legitimašuvnna notarius publicussii
Gustojeaddji legitimašuvdna lea:
• pássa
• ođđasat norgga vuodjinkoarta
• norgga báŋkokoarta mas lea govva
• nationála ID-koarta Norggas ja eará EEO- ja EFTA-riikkain
Man ollu máksá notariusduođaštus?
Notariusduođaštus máksá 319 ruvnno juohke dokumeantta ovddas maid notarius publicus duođašta. Don fertet máksit diggegotti vuostáiváldimis. Geavat áinnas báŋkokoartta.
Iešguđetlágan notariusduođaštusat
Vuolláičála- duođaštus
Dát lea duođaštus mainna notarius publicus duođašta du vuolláičállaga dokumeanttas.
Jus áiggut oažžut dán duođaštusa, de fertet persovnnalaččat fitnat notarius publicusa luhtte, gos čálát vuollái dokumeanta.
Vuolláičállon duođaštus ja vuolláičálavuoigatvuohta fitnodaga ovddas
Dát lea duođaštus mainna notarius publicus duođašta du vuolláičállaga ja seammás duođašta ahte don sáhtát vuolláičállit dan fitnodaga ovddas maid ovddastat.
Jus áiggut oažžut dán duođaštusa, de fertet persovnnalaččat fitnat notarius publicusa luhtte, gos čálát vuollái dokumeanta. Váldde fárrui fitnodatduođaštusa Brønnøysund-registaris. Fitnodatduođaštus ferte leat originála iige galgga leat boarráset go 3 mánu.
Stáhta autoriserejuvvon jorgaleaddji duođaštus
Dát lea duođaštus gos notarius publicus duođašta jorgaleaddji vuolláičállaga, gii lea jorgalan ja vuolláičállán dokumeantta. Notarius publicus duođašta maid ahte jorgaleaddjis lea stáhtaautorisašuvdna.
Dán duođaštusa sáhtát oažžut guovtti láhkái:
Jorgaleaddji fitná notarius publicusa luhtte dokumeanttain, lobálaš legitimašuvnnain, jorgalanlobiin ja steampaliin. Jorgaleaddji vuolláičállá dokumeantta notáriála publicusas.
Jus jorgaleaddji lea deponeren/vurken vuolláičállaga notarius publicus/diggegottis, de ii dárbbaš jorgaleaddji boahtit persovnnalaččat.
Origináladokumeanta duođaštus
Dáinna duođaštusain duođašta notarius publicus ahte dokumeanta lea originála. Notarius publicus ii sáhte duođaštit buotlágán originála dokumeanttaid, ja mii eat goassege duođaš olgoriikka oahppoduođaštusaid dahje eará olgoriikka dokumeanttaid.
Jus galggat oažžut dán duođaštusa, de fertet váldit mielde origináladokumeantta maid dáhtot duođaštuvvot. Notarius publicus gáibida ahte dokumeanttas lea originálalaš vuolláičála ja steampil.
Rivttes kopiija duođaštus
Dát lea duođaštus mainna notarius publicus duođašta rivttes kopiija originála dokumeanttas. Notarius publicus ii duođaš rivttes kopiija buotlágán dokumeanttain, ja mii eat goassege duođaš kopiija olgoriikkalaš dokumeanttain.
Oažžun dihte dán duođaštusa, de fertet váldit mielde origináladuođaštusa, mas dáhtot rivttes kopiija duođaštuvvot. Notarius publicus váldá ieš kopiija dokumeanttas.
Gutnálaš ja oamedovddolaš dáhkádus
Gutnálaš ja oamedovddolaš dáhkádus mearkkaša ahte olmmoš dáhkida notarius publicussii dokumeantta sisdoalu. Lea ráŋggáštahtti addit boasttu dáhkádusa.
Jus dáhttot duođaštit ahte leat dáhkidan, de fertet persovnnalaččat boahtit. Váldde mielde dokumeantta maid áiggut dáhkidit
Dearvvašvuođaautorisašuvdna
Dát duođašta ahte doavttir dahje eará dearvvašvuođabargiin lea autorisašuvdna bargat Norggas.
Jus dáhttot dán duođaštusa, de fertet váldit mielde dan dokumeantta maid dáhttot dohkkehuvvot. Dokumeanttas galgá leat vuolláičála ja steampal mas lea HPR-nummir. Almmolaš dohkkehuvvon dearvvašvuođabargiin ja elliiddearvvašvuođabargiin Norggas lea HPR-nummir.
Eallinduođaštus
Dát lea duođaštus mainna notarius publicus duođašta ahte don leat eallimin.
Oažžun dihte dán duođaštusa, de fertet boahtit persovnnalaččat ja čájehit lobálaš legitimašuvnna.
Geahča maid
Olgoriikadepartameantta dieđuid legaliserema birra
- Stáhtahálddašeaddji dieđuid apostille birra
- Láhka notarius publicus birra lovdatas
- Láhkaásahus notarius publicus birra lovdatas