Delvis fullbyrding av fengselsstraff etter brot på vilkår om narkotikaprogram med domstolskontroll
Høgsteretts dom 4. april 2019, HR-2019-677-A, (sak nr. 19-010822STR-HRET), straffesak, anke over dom:
A (advokat Halvard Helle) mot Påtalemakta (statsadvokat Iris Øsp Lydsdottir Storås)
Dommarar: Indreberg, Matheson, Ringnes, Bergh, Lindsetmo
Høgsterett kom til at den domfelte etter brot på eit slikt særvilkår skulle sone 8 månader av fengselsstraffa på 18 månader. Kor stor del av fengselsstraffa som skulle fullbyrdast, blei avgjort etter eit heilskapleg skjønn.
Høgsterett fann det naturleg å ta utgangspunkt i kor stor forholdsmessig del av den fastsette gjennomføringstida den domfelte faktisk hadde gjennomført etter oppstart av programmet. Dette utgangspunktet blei korrigert for måten den domfelte hadde stilt seg til programmet på under gjennomføringa.
Avgjerda har betydning for fastsettinga av kor stor del av ei fengselsstraff på vilkår som må fullbyrdast etter brot på vilkår om narkotikaprogram med domstolskontroll.