Straffutmåling for eldspåsetjing
Høgsteretts dom 26.06.2009, HR-2009-01338-A, (sak nr. 2009/645), straffesak, anke over dom
A (advokat Gunnar K. Hagen) mot Den offentlege påtalemakta (kst. førstestatsadvokat Ole Bredrup Sæverud)
Dommarane: Tønder, Matningsdal, Utgård, Indreberg, Lund
Saka gjeld straffutmåling etter domfelling for brot på straffelova § 148 for eldspåsetjing med fare for tap av menneskeliv, der gjerningsmannen er lettare psykisk utviklingshemma, jf. straffelova § 56 bokstav c.
A, fødd 5. juni 1965, er psykisk utviklingshemma med ein IQ på 56. Han blei sett under tiltale for eldspåsetjing med fare for tap av menneskeliv og for i den samanheng å ha gjort grovt skadeverk. I tillegg omfatta tiltalen to eldre tilfelle av truslar og skadeverk. Han blei av tingretten dømd etter tiltalen til ei straff av fengsel i to år og åtte månader, ei straff som blei stadfesta av lagmannsretten.
Høgsterett fann at straffelova § 56 bokstav c måtte nyttast som følgje av dei svekte mentale evnene hans. Etter frådrag for tilståing blei straffa sett til fengsel i eitt år og seks månader. Straffa var sona ved uthalde varetektssurrogat i form av institusjonsopphald. Éin dommar stemde for at straffa skulle setjast til fengsel i seks månader.