Straffutmåling ved brot på utlendingslova
Høgsteretts dom 29.06.2009, HR-2009-01354-A, (sak nr. 2009/662), straffesak, anke over dom
A (advokat Harald Stabell) mot Den offentlege påtalemakta (førstestatsadvokat Lasse Qvigstad)
Dommarane: Øie, Endresen, Tjomsland, Bruzelius, Schei
Saka gjeld straffutmåling ved brot på utlendingslova § 47 tredje ledd bokstav b, som blant anna rettar seg mot den som hjelper ein utlending til ulovleg å reise inn i riket.
Den domfelte var funnen skuldig i å ha hjelpt ein iransk statsborgar med å reise ulovleg frå Frankrike og inn i Noreg. Han tok ikkje initiativ til å hjelpe til med den ulovlege innreisa, men blei bedt om hjelp av far til utlendingen, og han var ikkje sjølv del av eller opererte i samarbeid med noko organisert nettverk. Han hjelpte heller ikkje til for eiga vinning. Det låg ikkje føre nemneverdige formildande omstende.
Dei tidlegare instansane fastsette straffa til fengsel utan vilkår i 120 dagar. Fleirtalet i Høgsterett fann at straffa burde setjast til fengsel utan vilkår i 60 dagar. Éin dommar meinte at A burde dømmast til 45 timar samfunnsstraff med 90 dagars gjennomføringstid, subsidiært fengsel i 45 dagar.