Sámedikki lohpi julggaštit ovddasteaddji oasehasveahki
Alimusrievtti buvttáhus golggotmánu 14. b. 2020, HR-2020-1956-A, (ášši nr. 19-183958SIV-HRET) ja (ášši nr. 19-183965SIV-HRET), siviila ášši, buvttáhusa guoddaleapmi.
Sámediggi (advokáhta Joakim Bakke-Nielsen) (Rievttálaš veahkki: advokáhta John Gjermund Flatabø), A, B (advokáhta Sicilie Kristin Kanebog) vuostá X gieldda (advokáhta Roald Angell)
Duopmárat: Øie, Indreberg, Matheson, Ringnes, Steinsvik
Guokte sámenissona leigga čuoččáldahttán ášši dan gieldda vuostá gos soai bajásšattaiga, ja gáibidan buhtadusa go mánáidsuodjalus nu váilevaččat čuovvulii sudno mánnán. Lágamánnerievtti ovddas celkkii Sámedikki oasehasveahki riidolága § 15-7 vuosttas lađđasa b bustáva mielde ovddasteaddji oasehasveahki birra. Lágamánneriekti ii suovvan loaidat oasehasveahkki.
Alimusriekti gávnnahii ahte suovvá Sámedikki loaidat oasehasveahkkin.
Sámediggi gulai almmolaš ásahusaid biirii mii sáhttá julggaštit ovddasteaddji oasehasveahki, ásahussan man bargun lea ovddidit vásedin beroštumiid. Sámedikkis lei maiddái doarvái čatnašupmi buhtadusáššiide. Áššit čuoččáldahtte prinsipiála vuoigatvuođagažaldaga ahte maid mearkkašivččii jus rihkošii sámi vuoigatvuođaid mearridettiin gieldda buhtadusovddasvástádusa lasá vahátbuhtaduslága § 2-1 mielde. Sámedikkis lei čielga prejudikáhtaberoštupmi dán gažaldagas. Sámedikki doaibma ovddasteaddji ásahussan sámi beroštumiid áimmahuššamis, dagai govttolažžan ja lunddolažžan ahte Sámediggi oaččui lobi loaidat oasehasveahkkin.
Alimusriekti dasto oaivvildii ahte almmolaš orgánii mii deavdá eavttuid loaidat ovddasteaddji oasehasveahkkin, ii gusto oasehasgealbbu gáibádus riidolága § 2-1 mielde.
Mearrádus čielggada almmolaš ásahusain ovddasteaddji oasehasveahki eavttuid.